រដ្ឋបាលខេត្តព្រៃវែង បង្កើនកម្ដៅដុតដៃដុតជើង បង្ក្រាបបទល្មើសឆបោកតាមប្រព័ន្ធបច្ចេកវិទ្យា (Online Scams)
កិច្ចប្រជុំកម្រិតថ្នាក់ដឹកនាំ និងសមត្ថកិច្ចចម្រុះនេះ មានសមាសភាពចូលរួមសរុប ៣៧២រូប រាប់ចាប់ពីថ្នាក់ដឹកនាំខេត្ត តុលាការ កងកម្លាំងប្រដាប់អាវុធទាំងបី ប្រធានមន្ទីរ-អង្គភាព រហូតដល់អភិបាលក្រុង ស្រុកទាំង១៣ នាយកទីចាត់ការ ប្រធានអង្គភាព ប្រធានផ្នែកចំណុះសាលាខេត្ត ប្រធានទីស្នាក់ការច្រកទ្វារព្រំដែនអន្តរជាតិ មេបញ្ជាការវរៈសេនាតូច នគរបាលការពារព្រំដែនគោលលេខ៦០៧ មេបញ្ជាការវរៈសេនាការពារព្រំដែនលេខ២២៩ មេឃុំ-ចៅសង្កាត់ និងនាយប៉ុស្តិ៍នគរបាលរដ្ឋបាលទូទាំងខេត្ត។
ការជួបជុំជួរថ្នាក់ដឹកនាំយ៉ាងកកកុញនាពេលនេះ បានស្តែងឱ្យឃើញយ៉ាងច្បាស់ពី ឆន្ទៈមោះមុត និងការប្តេជ្ញាចិត្តខ្ពស់បំផុត របស់រាជរដ្ឋាភិបាល ក៏ដូចជារដ្ឋបាលខេត្តព្រៃវែង ក្នុងការដាក់ចេញនូវវិធានការក្តៅ ស្រាវជ្រាវ និងទប់ស្កាត់រាល់ទម្រង់នៃបទល្មើសឆបោកតាមអនឡាញ ដើម្បីការពារសន្តិសុខ សណ្តាប់ធ្នាប់សង្គម និងផលប្រយោជន៍របស់ប្រជាពលរដ្ឋឱ្យបានដាច់ខាត៕
