🚨 BREAKING NEWS | ខេត្តកណ្ដាល៖ សំណង់បន្ទប់ជួល ៣ បន្ទប់ ត្រូវគេចោទថាសាងសង់លើចំណីផ្លូវ និងប្រព័ន្ធលូ — សាធារណជនស្នើអាជ្ញាធរចុះពិនិត្យ និងចាត់វិធានការតាមច្បាប់!

 🚨 BREAKING NEWS | ខេត្តកណ្ដាល៖ សំណង់បន្ទប់ជួល ៣ បន្ទប់ ត្រូវគេចោទថាសាងសង់លើចំណីផ្លូវ និងប្រព័ន្ធលូ — សាធារណជនស្នើអាជ្ញាធរចុះពិនិត្យ និងចាត់វិធានការតាមច្បាប់!

ខេត្តកណ្ដាល៖ សំណង់បន្ទប់ជួលចំនួន ៣ បន្ទប់ កំពុងបន្តសាងសង់យ៉ាងសកម្មនៅតំបន់ប្រព័ន្ធលូ និងចំណីផ្លូវសាធារណៈ ស្ថិតក្នុងភូមិព្រៃបឹង ឃុំបែកចាន ស្រុកអង្គស្នួល ខេត្តកណ្ដាល។ តាមការអះអាងដែលត្រូវបានផ្សព្វផ្សាយ ម្ចាស់ការដ្ឋានត្រូវបានគេស្គាល់ថា លោក ស៊ិន សំអាង មេឃុំបែកចាន។

ករណីនេះបានបង្កឱ្យមានការចាប់អារម្មណ៍ និងការព្រួយបារម្ភពីសំណាក់ប្រជាពលរដ្ឋ ពាក់ព័ន្ធនឹងសណ្ដាប់ធ្នាប់សាធារណៈ ការរំដោះទឹកភ្លៀង និងការប្រើប្រាស់ចំណីផ្លូវសាធារណៈ។

តាមការអះអាងរបស់លោក ស៊ិន សំអាង ដែលបានប្រាប់ក្រុមអ្នកសារព័ត៌មាន លោកបានបញ្ជាក់ថា ទីតាំងសាងសង់ស្ថិតនៅលើដីដែលលោកអះអាងថាមានប្លង់កម្មសិទ្ធិត្រឹមត្រូវ។ លោកក៏បានលើកឡើងថា «ខ្ញុំមិនសុំច្បាប់នរណាទេ» និងបានបញ្ជាក់ថា ប្រសិនបើរដ្ឋត្រូវការទីតាំង លោកនឹងឈូសឆាយសំណង់ចេញវិញ។

លោកក៏បានទទួលស្គាល់ថា លោកបានដឹងអំពីសេចក្តីជូនដំណឹងរបស់រដ្ឋបាលខេត្តកណ្ដាល ស្តីពីការហាមឃាត់ និងទប់ស្កាត់ការសាងសង់សំណង់នៅលើចំណីផ្លូវសាធារណៈ ប៉ុន្តែលោកយល់ថា ទីតាំងដែលកំពុងសាងសង់គឺជាដីកម្មសិទ្ធិរបស់លោក។

ជុំវិញបញ្ហានេះ ប្រជាពលរដ្ឋ និងអ្នកតាមដានបញ្ហាសង្គម ស្នើឱ្យអាជ្ញាធរជំនាញចុះពិនិត្យជាក់ស្តែងលើទីតាំង ដើម្បីកំណត់ឱ្យបានច្បាស់ថា តើផ្នែកណាជាដីកម្មសិទ្ធិឯកជន និងផ្នែកណាជាចំណីផ្លូវ ឬប្រព័ន្ធលូសាធារណៈ ព្រមទាំងពិនិត្យអំពីលិខិតអនុញ្ញាតសាងសង់ និងឯកសារពាក់ព័ន្ធផ្សេងៗ។

គួររំលឹកថា កាលពីថ្ងៃទី ២០ ខែមីនា ឆ្នាំ២០២៦ រដ្ឋបាលខេត្តកណ្ដាលបានចេញសេចក្តីជូនដំណឹងពាក់ព័ន្ធនឹងការហាមឃាត់ និងទប់ស្កាត់ការសាងសង់សំណង់ ការលក់ដូរ និងការរុះរើសំណង់នៅលើចំណីផ្លូវសាធារណៈក្នុងភូមិសាស្ត្រខេត្តកណ្ដាល ក្នុងគោលបំណងរក្សាសោភ័ណភាព សណ្ដាប់ធ្នាប់ និងធានាការរំដោះចរន្តទឹកភ្លៀង។

ដូច្នេះ សំណួរដែលកំពុងត្រូវបានសាធារណជនលើកឡើង គឺ៖ តើសំណង់ទាំង ៣ បន្ទប់នេះ ស្ថិតនៅលើដីកម្មសិទ្ធិឯកជនស្របច្បាប់ទាំងស្រុង ឬមានផ្នែកណាមួយរំលោភលើចំណីផ្លូវ និងប្រព័ន្ធលូសាធារណៈ?

សាធារណជនស្នើសុំឱ្យ លោក នូ សុវណ្ណារិទ្ធ អភិបាលស្រុកអង្គស្នួល និង ឯកឧត្តម គួច ចំរើន អភិបាលនៃគណៈអភិបាលខេត្តកណ្ដាល ចាត់ឱ្យមន្ត្រីជំនាញចុះពិនិត្យជាក់ស្តែង ដោយមានការវាស់វែង និងផ្ទៀងផ្ទាត់ឯកសារកម្មសិទ្ធិ ព្រមទាំងឯកសារអនុញ្ញាតសាងសង់ ដើម្បីរកការពិត និងអនុវត្តវិធានការតាមច្បាប់ ប្រសិនបើរកឃើញថាមានការរំលោភបំពានលើដីសាធារណៈ ឬសំណង់ដែលមិនស្របតាមបទប្បញ្ញត្តិ។

មហាជនក៏កំពុងរង់ចាំមើលថា តើអាជ្ញាធរខេត្តកណ្ដាលនឹងចាត់វិធានការយ៉ាងណា ដើម្បីធានាថា ច្បាប់ និងសេចក្តីជូនដំណឹងរបស់រដ្ឋបាលខេត្ត ត្រូវបានអនុវត្តដោយស្មើភាពចំពោះគ្រប់ភាគី — មិនថាជាពលរដ្ឋទូទៅ ឬជាមន្ត្រីមូលដ្ឋានក៏ដោយ។