ថ្នាក់ដឹកនាំខេត្តព្រៃវែង បើកការិយាល័យ BLO កោះរកា ពង្រឹងកិច្ចសហការប្រយុទ្ធប្រឆាំងគ្រឿងញៀនតាមព្រំដែន!
ការបើកដំណើរការការិយាល័យ BLO កោះរកា ត្រូវបានចាត់ទុកថា ជាយន្តការសំខាន់មួយក្នុងការពង្រឹងកិច្ចសហប្រតិបត្តិការ ការផ្លាស់ប្តូរព័ត៌មាន និងការសម្របសម្រួលការងាររវាងសមត្ថកិច្ចពាក់ព័ន្ធនៅតាមព្រំដែន ក្នុងគោលដៅរួមចំណែកទប់ស្កាត់ និងប្រយុទ្ធប្រឆាំងបទល្មើសគ្រឿងញៀនឆ្លងដែនឱ្យកាន់តែមានប្រសិទ្ធភាព។
ក្នុងឱកាសនោះ ឯកឧត្តមនាយឧត្តមសេនីយ៍ មាស វិរិទ្ធ ក៏បានឧបត្ថម្ភសម្ភារៈ និងឧបករណ៍ចាំបាច់មួយចំនួនជូនដល់ការិយាល័យ BLO កោះរកា រួមមាន ម៉ូតូ ០១គ្រឿង កុំព្យូទ័រ ០១គ្រឿង ម៉ាស៊ីនព្រីនធ័រ ០១ឈុត អាយកូម ០៥ដើម និងខ្នោះ ១០ សម្រាប់ប្រើប្រាស់ក្នុងការិយាល័យ និងបម្រើដល់ប្រតិបត្តិការងារប្រចាំថ្ងៃរបស់អង្គភាព។
ពិធីនេះមានការអញ្ជើញចូលរួមពី ឯកឧត្តមអគ្គលេខាធិការរង ឯកឧត្តមប្រធាននាយកដ្ឋាន និងគណៈប្រតិភូអមដំណើរនៃអាជ្ញាធរជាតិប្រយុទ្ធប្រឆាំងគ្រឿងញៀន តំណាងអង្គការ UNODC ប្រចាំនៅកម្ពុជា ប្រតិភូការិយាល័យទំនាក់ទំនងព្រំដែនធឿនភឿក ខេត្តដុងថាប់ ព្រមទាំងថ្នាក់ដឹកនាំខេត្តព្រៃវែង កងកម្លាំងទាំងបី មន្ទីរ-អង្គភាពពាក់ព័ន្ធ អាជ្ញាធរស្រុក និងមន្ត្រីជំនាញជាច្រើនរូប។
ជាមួយគ្នានេះ ក៏មានវត្តមានប្រធានទីស្នាក់ការច្រកទ្វារព្រំដែនទាំង៦ មេបញ្ជាការវរសេនាតូចនគរបាលការពារព្រំដែនលេខ៦០៧ មេបញ្ជាការកងវរសេនាលេខ២២៩ និងមន្ត្រីពាក់ព័ន្ធចូលរួមផងដែរ។
ការដាក់ឱ្យដំណើរការជាផ្លូវការនូវ BLO កោះរកា ត្រូវបានរំពឹងថា នឹងក្លាយជាចំណុចសំខាន់មួយសម្រាប់ពង្រឹងការសហការរវាងស្ថាប័នពាក់ព័ន្ធ និងការងារសន្តិសុខតាមព្រំដែន ជាពិសេសការទប់ស្កាត់បទល្មើសគ្រឿងញៀន និងបទល្មើសពាក់ព័ន្ធឆ្លងដែន ដើម្បីរួមចំណែកការពារសន្តិសុខ សុវត្ថិភាព និងសុខុមាលភាពប្រជាពលរដ្ឋនៅតំបន់ព្រំដែន។
