ពលរដ្ឋដាក់សញ្ញាសួរលើអាជ្ញាធរខណ្ឌសែនសុខ! ទីតាំងល្បែងមាន់ជល់អនឡាញយីហោ «ពូប៉េអឹម 88» បើកលេងយ៉ាងព្រហើន!
តាមប្រភពព័ត៌មានពីពលរដ្ឋ បានរាយការណ៍ថា ទីតាំងល្បែងស៊ីសងប្រភេទមាន់ជល់អនឡាញតាមកញ្ចក់ទូរទស្សន៍នេះ មានទីតាំងស្ថិតនៅចំណុច «តារាងបាល់ទះ ពូប៉េអឹម 88» លើផ្លូវលេខ ១០០៨ ក្នុងសង្កាត់ភ្នំពេញថ្មី ខណ្ឌសែនសុខ រាជបារីភ្នំពេញ។
ករណីបណ្តោយឱ្យមានល្បែងស៊ីសងបើកចំហរែបនេះ បានធ្វើឱ្យមហាជនសង្ស័យថា តើទីតាំងនេះជា «ឆ្នាំងបាយ» របស់អាជ្ញាធរមូលដ្ឋានទេដឹង? បានជាមិនឃើញមានវិធានការបង្ក្រាបទាល់តែសោះ។
ករណីនេះ កំពុងបង្កការព្រួយបារម្ភយ៉ាងខ្លាំងពីបញ្ហាសន្តិសុខសង្គម លួច ឆក់ ប្លន់ និងអំពើហិង្សាក្នុងគ្រួសារ ដែលកើតចេញពីវង់ល្បែង។
អាស្រ័យហេតុនេះ ប្រជាពលរដ្ឋគោរពអំពាវនាវ និងស្នើសុំយ៉ាងទទូចដល់ឯកឧត្តម ឃួង ស្រេង អភិបាលនៃគណៈអភិបាលរាជធានីភ្នំពេញ
នឹង ឯកឧត្តម ឧត្តមសេនីយ៍ឯក ជួន ណារិន្ទ អគ្គស្នងការរង និងជាស្នងការនគរបាលរាជធានីភ្នំពេញ
ព្រមទាំង លោក ចេង មុនីរ៉ា អភិបាល នៃគណៈអភិបាលខណ្ឌសែនសុខ
និង លោកវរសេនីយ៍ឯក ហួរ ម៉េងវ៉ាង អធិការខណ្ឌសែនសុខ
មេត្តាជួយចាត់កម្លាំងចុះពិនិត្យ និងបង្ក្រាបទីតាំងល្បែងខុសច្បាប់មួយនេះជាបន្ទាន់ ដើម្បីផ្តល់ភាពកក់ក្តៅជូនប្រជាពលរដ្ឋ និងពង្រឹងគោលនយោបាយភូមិ-ឃុំមានសុវត្ថិភាព៕
