ឯកឧត្តម សួន សុម៉ាលីន ដឹកនាំកិច្ចប្រជុំពិគ្រោះយោបល់ លើកកម្ពស់ការផ្តល់សេវារដ្ឋបាលជូនប្រជាពលរដ្ឋនៅស្រុកស្វាយអន្ទរ!
កិច្ចប្រជុំនេះរៀបចំឡើងក្នុងគោលបំណងពិគ្រោះពិភាក្សាអំពី បញ្ហាប្រឈម សំណើ និងសំណូមពររបស់ប្រជាពលរដ្ឋ ពាក់ព័ន្ធនឹងការទទួលសេវារដ្ឋបាលនៅមូលដ្ឋាន ដើម្បីស្វែងរកដំណោះស្រាយ និងឆ្លើយតបឱ្យបានកាន់តែប្រសើរទៅនឹងតម្រូវការរបស់ប្រជាពលរដ្ឋ។
ជាមួយគ្នានេះ កិច្ចប្រជុំក៏ផ្តោតលើការលើកកម្ពស់ប្រសិទ្ធភាពនៃការផ្តល់សេវារដ្ឋបាល តាមរយៈយន្តការច្រកចេញចូលតែមួយនៅរដ្ឋបាលខេត្ត ក្រុង ស្រុក ឃុំ សង្កាត់ ដោយផ្តល់សេវាជូនប្រជាពលរដ្ឋឱ្យកាន់តែ មានតម្លាភាព ប្រសិទ្ធភាព ឆាប់រហ័ស និងប្រសិទ្ធផលខ្ពស់ ស្របតាមតម្រូវការជាក់ស្តែងរបស់ប្រជាពលរដ្ឋនៅមូលដ្ឋាន។
កិច្ចប្រជុំនេះមានការអញ្ជើញចូលរួមពី ឯកឧត្តម លោកជំទាវ អភិបាលរងខេត្ត លោកនាយក និងនាយករងរដ្ឋបាលសាលាខេត្ត ស្នងការនគរបាលខេត្ត មេបញ្ជាការកងរាជអាវុធហត្ថខេត្ត ប្រធានក្រុមប្រឹក្សាស្រុក អភិបាល អភិបាលរងស្រុក ក្រុមការងារថ្នាក់ខេត្តគាំទ្រការផ្តល់សេវា ប្រធានមន្ទីរពាក់ព័ន្ធ ប្រធាន និងអនុប្រធានអង្គភាពច្រកចេញចូលតែមួយខេត្ត នាយក និងនាយករងរដ្ឋបាលសាលាស្រុក ប្រធានការិយាល័យ មន្ត្រីចំណុះរដ្ឋបាលស្រុក មេឃុំ និងស្មៀនឃុំ សរុបចំនួន ១០៣រូប។
តាមរយៈកិច្ចប្រជុំនេះ ការប្រមូលយកមតិយោបល់ និងសំណូមពរពីមូលដ្ឋាន ត្រូវបានចាត់ទុកជាផ្នែកសំខាន់មួយក្នុងការកែលម្អការផ្តល់សេវារដ្ឋបាល ឱ្យកាន់តែឆ្លើយតបនឹងតម្រូវការរបស់ប្រជាពលរដ្ឋ និងបង្កើនទំនុកចិត្តរបស់ប្រជាពលរដ្ឋចំពោះការផ្តល់សេវាសាធារណៈនៅមូលដ្ឋាន។
