ព្រះសង្ឃរួមកម្លាំងជាមួយជាតិ! សាលាគណខេត្តព្រៃវែង ប្រគល់ស្បៀងអាហារគាំទ្រ «មូលនិធិខេត្តព្រៃវែង សម្រាប់គាំទ្រសមរភូមិជួរមុខ»
ការរួមចំណែកដ៏មានអត្ថន័យនេះ គឺជាការបង្ហាញពីតួនាទីដ៏សំខាន់របស់ព្រះពុទ្ធសាសនា ក្នុងការរួមសុខរួមទុក្ខជាមួយជាតិ និងប្រជាពលរដ្ឋ ព្រមទាំងផ្តល់កម្លាំងចិត្តដល់វីរកងទ័ពកម្ពុជា ដែលកំពុងឈរជើងការពារបូរណភាពទឹកដី ឯករាជ្យ និងអធិបតេយ្យជាតិ។ ជាមួយគ្នានេះ ក៏ជាការចូលរួមជួយដល់ប្រជាពលរដ្ឋដែលបានជម្លៀសខ្លួនដោយសារស្ថានភាពជម្លោះ និងកំពុងជួបការលំបាកក្នុងជីវភាពរស់នៅប្រចាំថ្ងៃផងដែរ។
រដ្ឋបាលខេត្តព្រៃវែង បានថ្លែងអំណរគុណយ៉ាងជ្រាលជ្រៅចំពោះ សាលាគណខេត្តព្រៃវែង និងព្រះថេរានុថេរៈគ្រប់ព្រះអង្គ ដែលបានសណ្តោសប្រណី និងចូលរួមយ៉ាងសកម្មក្នុងបុព្វហេតុជាតិ។ ទឹកព្រះទ័យដ៏ថ្លៃថ្លានេះ គឺជាគំរូដ៏ប្រពៃនៃការរួបរួមរវាងព្រះពុទ្ធសាសនា អាជ្ញាធរ និងប្រជាពលរដ្ឋ ក្នុងការជួយគ្នាឆ្លងកាត់គ្រាលំបាក។
សកម្មភាពដ៏ប្រពៃនេះ បានឆ្លុះបញ្ចាំងឱ្យឃើញថា ព្រះសង្ឃមិនត្រឹមតែជាទីពឹងផ្នែកពុទ្ធចក្រ និងសីលធម៌ប៉ុណ្ណោះទេ ប៉ុន្តែថែមទាំងជាកម្លាំងដ៏សំខាន់ក្នុងការចូលរួមការងារមនុស្សធម៌ និងការលើកកម្ពស់ស្មារតីស្រឡាញ់ជាតិផងដែរ។
ជាមួយនេះ រដ្ឋបាលខេត្តព្រៃវែង សូមប្រគេនពរ និងជូនពរ សាលាគណខេត្តព្រៃវែង ព្រមទាំងព្រះថេរានុថេរៈគ្រប់ព្រះអង្គ សូមប្រកបដោយពុទ្ធពរទាំងបួនប្រការ គឺ អាយុ វណ្ណៈ សុខៈ ពលៈ កុំបីឃ្លៀងឃ្លាតឡើយ និងសូមឱ្យព្រះពុទ្ធសាសនារីកចម្រើនគង់វង្ស ជាម្លប់ដ៏ត្រជាក់សម្រាប់ប្រជាពលរដ្ឋ និងជាតិមាតុភូមិជារៀងរហូត។
