ឯកឧត្តម សាយ សំអាល់ ប្រគល់បណ្ណកម្មសិទ្ធិដីធ្លីជូនពលរដ្ឋស្រុកកំចាយមារ ជំរុញសន្តិសុខកម្មសិទ្ធិ និងការអភិវឌ្ឍមូលដ្ឋាន!
ពិធីនេះប្រព្រឹត្តទៅក្រោមអធិបតីភាពដ៏ខ្ពង់ខ្ពស់របស់ ឯកឧត្តម សាយ សំអាល់ ឧបនាយករដ្ឋមន្ត្រី រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ និងឯកឧត្តម ជា សុមេធី រដ្ឋមន្ត្រីក្រសួងសង្គមកិច្ច អតីតយុទ្ធជន និងយុវនីតិសម្បទា នៅបរិវេណវត្តជោតិវ័ន្ត (ហៅវត្តជាច) ស្ថិតក្នុងឃុំជាច ស្រុកកំចាយមារ ខេត្តព្រៃវែង។
ការប្រគល់វិញ្ញាបនបត្រសម្គាល់ម្ចាស់អចលនវត្ថុនាពេលនេះ គឺជាការបន្តអនុវត្តគោលនយោបាយរបស់រាជរដ្ឋាភិបាលក្នុងការពន្លឿនការចុះបញ្ជីដីធ្លី និងផ្តល់កម្មសិទ្ធិស្របច្បាប់ជូនប្រជាពលរដ្ឋ ដើម្បីធានាសន្តិសុខក្នុងការកាន់កាប់ដីធ្លី កាត់បន្ថយវិវាទ និងលើកកម្ពស់ជីវភាពរស់នៅរបស់ប្រជាពលរដ្ឋ។
ពិធីនេះក៏មានការអញ្ជើញចូលរួមពីថ្នាក់ដឹកនាំជាន់ខ្ពស់ មន្ត្រីរាជការ កងកម្លាំងប្រដាប់អាវុធគ្រប់លំដាប់ថ្នាក់ អាជ្ញាធរមូលដ្ឋាន ព្រមទាំងប្រជាពលរដ្ឋស្រុកកំចាយមារ សរុបប្រមាណ ១,៦៩២នាក់ ដែលបានបង្ហាញពីការគាំទ្រ និងការយកចិត្តទុកដាក់របស់រាជរដ្ឋាភិបាលចំពោះការពង្រឹងសិទ្ធិកម្មសិទ្ធិដីធ្លី និងការអភិវឌ្ឍប្រកបដោយចីរភាព។
