ស្នើសុំបង្ក្រាបទីតាំងមាន់អនឡាញខុសច្បាប់ក្នុងផ្ទះវីឡាទុកចោល ក្នុងសង្កាត់ព្រែកថ្មី ខណ្ឌច្បារអំពៅ!
ទីតាំងល្បែងខុសច្បាប់ខាងលើនេះ ស្ថិតនៅក្នុង ផ្ទះវីឡាមួយខ្នងដែលគេទុកចោល ក្នុងភូមិព្រែកថ្មីចុងព្រែក (នៅខាងក្រៅវត្តព្រែកប្រា) សង្កាត់ព្រែកថ្មី ខណ្ឌច្បារអំពៅ រាជធានីភ្នំពេញ។ ប្រភពពីប្រជាពលរដ្ឋបានឱ្យដឹងថា ទីតាំងនេះមានមនុស្សចេញចូលលេងយ៉ាងពុះកញ្ជ្រោលរៀងរាល់ថ្ងៃ ដោយពុំទាន់ឃើញមានអាជ្ញាធរ ឬសមត្ថកិច្ចមូលដ្ឋាន ចុះទៅពិនិត្យ ឬទប់ស្កាត់នៅឡើយទេ។
មហាជនមានការព្រួយបារម្ភយ៉ាងខ្លាំងអំពីបញ្ហាសន្តិសុខ និងសុវត្ថិភាព ដោយសារល្បែងស៊ីសងជាដើមហេតុបង្កឱ្យកើតមានបទល្មើសផ្សេងៗ ដូចជា ចោរកម្ម ហិង្សាក្នុងគ្រួសារ និងអំពើចោរលួចចោរប្លន់ជាដើម។ ប្រជាពលរដ្ឋសង្ឃឹមយ៉ាងមុតមាំថា អាជ្ញាធរខណ្ឌច្បារអំពៅ និងសមត្ថកិច្ចពាក់ព័ន្ធ នឹងចាត់វិធានការក្តៅលុបបំបាត់ទីតាំងនេះឱ្យបានឆាប់រហ័ស ដើម្បីពង្រឹងគោលនយោបាយ «ភូមិ-ឃុំ-សង្កាត់ មានសុវត្ថិភាព» ជូនប្រជាពលរដ្ឋក្នុងមូលដ្ឋាន៕
